Altzako Tokiko Bilduma Donostia Kulturak eta Altzako Historia Mintegiak sortutako dokumentazio zerbitzua da, Altzaren dokumentu-ondarea bildu, zaindu eta ezagutarazteko xedea duena. Bilduman mota eta eduki anitzeko dokumentuak daude (artxibo dokumentuak, argazkiak, prentsako kronikak, mapak, ikus-entzunezkoak...) eta egoitza Casares kultur etxean dauka. Bertan eskaintzen da kontsulta zerbitzua, baita Interneten ere, www.altza.info webgunearen bitartez. Une honetan 23.000tik gora dokumentu biltzen ditu, eta horietatik 19.600 baino gehiago eskuragarri daude webgunean. Azken horrek 92.289 bisita izan ditu azken hamabi hilabetetan.
Hastapenei erreparatzen badiegu, 1986. urtera joan behar dugu. Urte hartan Casares Kultur Etxea inauguratu zuten, eta harekin batera, Altzako Historia Mintegia lehen urratsak ematen hasi zen, dokumentuak bilatzeko eta biltzeko lanari ekinez.
Sei urte geroago, 1992an, bildutako dokumentuen lehen katalogoa argitaratu zen. Eta beste sei urte pasa ondoren, 1998. urtean, Donostiako Kultur Patronatuaren eta AHMren artean lehen lankidetza hitzarmena sinatu zen Altzako Tokiko Bilduma sortzeko, Casares Kultur Etxeko liburutegiaren zerbitzu osagarri gisa. Hitzarmen hori urtero berritu zen 2008. urtera arte. 2006an liburutegi zerbitzua Casaresetik Tomasene Kultur Etxe inauguratu berrira aldatu zen; horrek Kultur Etxearen zerbitzuak berrantolatzea eragin zuen eta airean geratu zen Tokiko Bildumaren etorkizuna.
Etenaldi horretan, 2008an, AHMk www.altza.info webgunea sortu zuen, Altzari buruzko Dokumentazio Zentro gisa.
2009ko urte amaieran, Donostia Kulturak eta AHMk berriro elkarlanari heldu zioten eta hitzarmen berri bat sinatu zuten; horrekin batera, Tokiko Bilduma zerbitzu soilik presentzial hutsa izatetik aurrez aurrekoa eta Internet bidezkoa izatera pasatu zen. Donostia Kultura eta AHMren arteko hitzarmena urtez urte berritu da, gaur egun arte.
Ia lau hamarkadaz zerbitzua eskaini ondoren, Altzako Tokiko Bildumak etorkizunari begira lanean jarraitu behar du, hiru oinarri sendotuz eta indartuz: dokumentu-funtsa handitzen eta aberasten jarraitzea; funtsaren hedapena hobetzea, ahalik eta jende gehienarengana heltzeko eta ikerketa bultzatzeko; eta erakundeen eta auzotarren babesa handitzea. Horixe da proiektua.
2024koa azaroan
Darieta bidea, 1 - 20017 ALTZA | tel +34 649496607 | posta@altza.info